ڕاگەیەندراوێک لە بزووتنەوەی ئایندەی کوردستانەوە بۆ ڕای گشتی و گەلی  تێکۆشەری کوردستان

ڕاگەیەندراوێک لە بزووتنەوەی ئایندەی کوردستانەوە بۆ ڕای گشتی و گەلی  تێکۆشەری کوردستان

کۆمەڵانی خەڵکی تێکۆشەری کوردستان!جەماوەری ئازادیخوازی  کوردستان!
ئێران و ناوچەکە لەبەردەم وەرچەرخانێکی مێژوویی گەورەدایە. شەپۆلی ناڕەزایەتییەکان و خۆپیشاندانە بەردەوامەکانی گەلانی ئێران، 

بە تایبەت پێشەنگایەتی و خۆڕاگری بێوێنەی گەلی کورد لە ڕۆژهەڵاتی کوردستان، ئاماژەیەکی ڕوونن بۆ ئەوەی کە تەمەنی ستەمکاری بەرەو کۆتایی دەچێت و دیوارەکانی ترس بۆ هەمیشە ڕووخاون.
ئێمە لە بزووتنەوەی ئایندەی کوردستان ، 

لە نزیکەوە و بە وردی چاودێری بارودۆخی مەیدانی و سیاسی و ئاڵۆزییەکانی ناوخۆی ڕژێمی ئێران دەکەین. پێمان وایە قۆناغی ئێستا، قۆناغی بڕیاردان و یەکلاکردنەوەی چارەنووسە. بۆیە، ڕوو لە تەواوی چین و توێژەکانی کۆمەڵگە، لە گەنجانی بوێر، ژنانی پێشەنگ، مامۆستایان، کرێکاران و تێکۆشەرانی ڕێگای ئازادی دەکەین و ڕایدەگەیەنین:
 
ئامادەکاری بۆ گۆڕانکاری خێرا: داوا لە جەماوەری گەلی کورد لە ڕۆژهەڵاتی کوردستان دەکەین لەوپەڕی ئامادەباشیدا بن بۆ هەر ئەگەر و گۆڕانکارییەکی خێرا و لەناکاو. بارودۆخی سیاسی و ئابووری و نێودەوڵەتی ڕژێم گەیشتووەتە بنبەست، ئەمەش دەرفەتێکی مێژوویی بۆ گەلی ئێمە خوڵقاندووە تا مافە ڕەواکانی خۆی بەدەستبهێنێت.

یەکڕیزی و ڕێکخستنی ناوخۆیی: پێویستە لە هەموو شار و شارۆچکە و گەڕەکەکاندا، ئاستی هەماهەنگی و کاری هەرەوەزی نێوان هاووڵاتیان بگاتە بەرزترین ئاست. یەکگرتوویی ئێوە، گەورەترین چەک و بەهێزترین قەڵایە بەرامبەر بە هەر هەوڵێکی سەرکوتکردن.
 
پاراستنی دەستکەوتەکان: وشیاری نەتەوەیی و سیاسی لەم ساتەدا ئەرکێکی باڵایە. پێویستە گەلەکەمان وەک هەمیشە بە وریاییەوە مامەڵە لەگەڵ پێشهاتەکان بکات و ڕێگە نەدات ئیرادەی ڕاستەقینەی خۆی پەراوێز بخرێت.

بانگەواز بۆ هێزە سیاسییەکان: داوا لە هەموو لایەن و هێزە سیاسییەکانی ڕۆژهەڵات دەکەین، لەژێر چەتری بەرژەوەندی باڵای نەتەوەییدا، 

هاوئاهەنگییەکانیان زیاتر بکەن بۆ ئەوەی لە کاتی هەر گۆڕانکارییەکدا، کوردستان خاوەن یەک گوتار و یەک هەڵوێستی سیاسی بێت.
کۆمەڵانی خەڵک!ئێمە لە بزووتنەوەی ئایندەی کوردستان، وەک بەشێک لە 

ئیرادەی ئێوە، بەڵێن دەدەین کە لەم قۆناغە هەستیارەدا پشتیوان و هاوکارێکی سەرەکی تێکۆشانەکانتان بین. بڕوامان وایە کە ئایندە بۆ ئەو گەلانەیە کە خۆیان بۆ گۆڕانکاری ئامادە دەکەن.

سەرکەوتن بۆ ئیرادەی گەل و نەمان بۆ ستەمکاران

ناوەندی بڕیار .
بزووتنەوەی ئایندەی
کوردستان: